يقول الأديب الظاهرة أحمدو سالم ولد الداهي (فتى إكَـيدي) رحمه الله تعالى :
ابْجَاوِ ماش منْ انوَيشْ = = الظهْرْ إرُوحْ احْوَاشِ
لعْوَيجَه لَما راحْ تيـش= = طياتْ اهْلْ الخرّاشِ
ويقول أيضا:
امْجيَّ للكَوْصْ اطْرَالِ = = عَنُّ عَادْ اعْليَّ غَالِ
وَانَ الَّ مَانِ متْوَالِ = = والْكَوْصْ امَّلِّ بالْخُصُوصْ
ذَ الِّ عَنْدُ مَاهُ فَالِ = = مَاشفْتُ عَنْدُ كُونْ الْكَوْصْ
أُ نَعْرَفْ عَنِّ لُكنْتْ الِّ = = دَهْرِ عَنْدُ دَهْرْ اللُّصُوصْ
وَللَّ دَهْرْ الْحَوْصْ امَّلِّ = = مَا نسْلكْ منْ نَگْلَعْ وانْحُوصْ
وله أيضا:
يَ امْرَيَّمْ منْتْ ابَّاهْ طَيْتْ = = اغْنَايَ لكْ والِّي ابْغَيْتْ
انْتِ، بيَّ انْتِ مَا اتْلَيْتْ = = النَّاثِ عَنْدِ نَاثِ
وايْلا رَيْتكْ رَانِي اسْعَيْتْ = = واعْلَ اثْرْ النَّاثِ حَاثِ
وايْلا مَا رَيْتكْ ذَاكْ هُونْ = = اعْليَّانَ والنَّاثِ
عدْوَانْ أُ لاَهُ جَايّْ دُونْ = = الْعدْوَانْ الثُّلاَثِي
وله أيضا:
گَطْ الْگيْتكْ عَامْ لَوَّلْ = = واعْليَّ مَلْگاكْ هَوَّلْ
واعْزمْتْ أنِّ مَا انْطَوَّلْ = = يَكَانِ نلْگاكْ
مَلْگَ مَاهُ ذَاكْ لَوَّلْ = = واعْگبْ ذَاكْ امْعَاكْ
اغْلَبْنِ وَلاَّ انْسَوَّلْ = = وامْفَكَّرْنِ هَاكْ
عَوْدَانِ نَلْگاكْ مَرَّ = = أُ مَرَّ مَا نَلگَاكْ
يَ عَيْشَةُ منْتْ قرَّ = = شنْهُ مَعْنَ ذَاكْ
وله أيضا:
يَ الْعَگلْ إِيلاَ تَمْ الْگوَّادْ = = إِگُودَكْ والصَّوَاگْ إِصُوگْ
إِيلَ ژُوگْ إِكدْ افْطَنْ زَادْ = = إِگُودَكْ وايْصُوگكْ عَنْ ژُوگْ
ژُوگْ أَرَانَكْ مَا كنْتْ اتْجِيهْ = = جَيْتُ والدَّوْگجْ مَالَكْ بِيهْ
لَعْدْ أُ جَيْتُ وَلاَّ خَلِّيهْ = = واصْبرْ ذَ مَاهْ ابْشِ مَلْصُوگْ
إِلاَ تَمَّيْتْ انْتَ بَدِيهْ = = منْ فگْدَكْ ل اتْرَابَكْ مَحْژُوگْ
ذَاكْ اشْغَادِ للدَّوْگجْ فِيهْ = = أثْرُ واشْغَادِ فِيهْ الْژُوگْ
وله أيضا:
عِيدكْ ذَ الِّ جَيْتِيهْ بِيهْ = = شِ مَاهُ هُوَّ مَا ايْجِيهْ
يَ عَيْشَةُ درْتِي اعْلِيهْ = = اجّهْدْ إِلَيْنْ ابْكَالكْ
والِّ يگْدرْ ينْشَالْ فِيهْ = = شلْتِيهْ أُ هُوَّ شَالكْ
وانْگُولْ الْحَگْ انْشَاللَّ = = ذَ الْعِيدْ إِبَانْ ابْگالكْ
وانْتِ للعِيدْ أُ يَاللَّ = = عِيدكْ ذَ يُخَلاَّلكْ
وله في "اكطاع" مع مسْيَلْ لعويجَه:
يَ لعْوَيْجَ ذَ امْنْ آمْبَايْ = = ذَ الْعَامْ أُ كثْرتْ ذَا اوْخَايْ
أُ وّعْرْ التَّوْرَسْ ل الِّي ابْغَايْـ = = تُ شَرْگكْ هَاذَ طَارِ
أُ لاَهُ شَاطنِّ وارْتْخَايْ = = إِيلَ نَعْطِيكْ أَخْبَارِ
والِّيلِ بِيكْ أَلاَّ الْخَيْرْ = = شَرْگكْ دَارْ امْنْ ادْيَارِ
أُ عَوَّامْ أُ نغْمسْ وَامْنِيرْ = = واحْذَايَ حَوْظْ امْكَارِ.
فقالت ردا عليه:
يَ احْمَدُّ سَالمْ لاَ اتْلَيْتْ = = اتْخَصَّرْ لغْنَ لاَ ابْغَيْتْ
انْتَ مَهَللَّ مَا انْسَيْتْ = = زَيْنْ أَعْيَادِ وَافْطَارِ
واغْنَاكْ الزَّيْنْ الِّي اسْمَيْتْ = = فِيهْ ابْيَاظِ واخْظَارِ
والْ شَيَّعْتْ إيلَ فَوْگْ جَيْتْ = = انْظَرَاتِ وَانْظَارِ
ظَرْكْ انْتَ منِّ لاَ اوْفَيْتْ = = أُ عتْ اعْلَ شَرْگْ اتْشَارِ
شَيْنَ عَنْدِ واسْكتّْ غَيْرْ = = مَا سَاقطْ عَنَّكْ عَارِ
والِّيلِ بِيكْ أَلاَّ الْخَيْرْ = = هَاذَ زَادْ انْت طَارِ
عيدك يمريم ماه فاش --- واتگد زاد ءُ عندك باش
حصرولك فرگان واحراش --- فيه الفيش أجيتيه انتِ
واكتلْ لعلياتْ التخواش --- منكْ واسكت واسكنت
ءُ عدت باش اجتمعولكْ باش --- إزينت فالعين ءُ بنتِ
يمريم ما شطنك لگباح --- انت گاع امريم كنتِ
وامنين اخلگ لگباح أباح --- مَعادْ امريم كون انتِ
رحمه الله رحمة واسعة